محبي الشوبينغ ومحبي الهمزات اليوم جبت ليكم همزة السنة او لي بزاف كيستناوها فالعالم كامل أو لي هي البلاك فريداي Black Friday و ما أدراك ما البلاك فريداي هاد النهار لي كيوصلو فيه التخفيضات حتى ل 70% بل أكثر من ذلك 90% إذن شنو كتسنا؟ بالي قبل لا يسالي.
إذن واش هاد البلاك فريداي حقيقة ولا خيال؟
واش بالصح الى شريت فهاد النهار غنكون ربحت ولا غنكون غي تقولبت؟
واش بالصح هاد التخفيضات كيوصلو لهاد الدرجة ولا غير خطط تسويقية باش يبيعو المنتوجات ديالهم؟
جميع هاد الاسئلة نحاولو نفهموها فهاد الموضوع ، أول حاجة هي شنو هو البلاك فريداي Black Friday منين جا أو كيفاش بان أول مرة أو فين؟ البلاك فريداي هو اليوم لي كيجي مباشرة بعد عيد الشكر أو هاد الاخير كيكون فآخر خميس فنوفمبر أي أن Black Friday غيكون فآخر جمعة من نفس الشهر او كيتعتبر هو اليوم الاول د بداية التسوق لعيد الميلاد ، إذن بعد ما كل سنة ابتداءا من هاد اليوم كيكون اقبال كبير على الاسواق لشراء الهدايا للاحتفال بعيد الميلاد أو برأس السنة الميلادية و نظرا للتنافس لي كيوقع بين المحلات التجارية كان على الناس د الماغكوتينغ يتحركوا باش يخليو الزبناء يشريو المنتوج ديالهم أو ماشي المنتوج د المنافسين فكان خصهم يلقاو طرق لي تجلب ليهم الزبائن أكثر او من بين الطرق لي استعملو او كانت ناجحة بزاف هي ينقصو من أثمنة بعض المنتوجات و خصوصا منها لي فات عليها الوقت أو كيما كنقولو ديموضات لكن بلا ماتوقع الشركة فخسارة.
أول حاجة خصني نعرف علاش سماوه الجمعة السوداء و ماشي البيضاء ، حسب الروايات المتداولة أن هاد اليوم الاول و بعد هاد التخفيضات لي كتكون كيوقع ازدحام او بلوكاج فالطريق أو الناس شادين الصف فالمحلات التجارية كلشي هادشي من أجل شراء بعض المنتوجات بأثمنة منخفضة قبل ما تسالا ، إذن من بعد هاد الروينة لي كتوقع فهاد النهار أو بالضبط فسنة 1960 أو من بعد يوم عمل شاق و طويل للشرطة لتنظيم حركة السير ، سماوه البوليس د مدينة فيلاديلفيا بالجمعة السوداء لأنه كيدوز عليهم كحل.
باش مانطولش بزاف او مراعاتا لكم باش ماتملوش قسمت هاد المقال لأجزاء فالجزء الثاني غنتعرفو على القوالب لي كيديرهم الشركات و المحلات التجارية فهاد اليوم أو غنكتاشفو واش بالصح كاينين تخفيضات أو كيفاش أنا كمستهلك نستافد من هاد النهار.
شعارنا الاخير :
"استهلك وخا غاتهلك المهم تكون عارف بيلا تقولبتي"