لكن واش هادشي بصاح ولا غير كذوب تقول الأسطورة أن هادشي كله غير طريقة للماركوتينغ باش الشناوا يزيدو المبيعات ديالهوم بحيث أن بعض المواقع تاترفع ثمن السلعة من قبل هاد المناسبة وتاتخفضها نهار العيد باش يبان بأنها نقصات من الثمن، الحقيقة أكيد أن بعض المواقع تاتستعمل هاد الطريقة باش تصيد بنادم اللي جديد بحيث تايبانليه تخفيض 75% تايشوف الربيع ماتايشوف الحافة، لكن بعض المواقع تاتدير تخفيضات حقيقية اللي فعلا تاتكون همزة، السنة الماضية شريت من جيربيست هميزات ب 0.01$ زائد مصاريف الشحن وأهم همزة خديتها هي واحد التليفون اللي تايدير 60$ خديتو ب 11.11$ لكن باش نكونو واقعيين الهمزة مغاديش تتسناك تاترشق لك أنت بالسلامة تجي تاخدها راه تاتنوض المخاطفة عليها (ماشي بحال القوالب ديال جوميا لكن كلشي تايزرب باش يشري) هاداك التليفون اللي خديت كانو 50 بياسة منو وكان عندي كوبون وقالو بأنه غادي يكون مفعل في التلاتة د العشية بقيت نجربو نجربو تا داز وشريت، كاين مواقع اللي تايديرو 5 تليفونات مثلا ب 11.11$ ولا تليفون غالي ب 111$ هادو غير ما تفكرش تشارك معاهوم بهاد سرعة الحلزون اللي عندنا ككونيكسيون.
شنو خصني ندير تا أنا باش نصيد الهمزة؟
- تكون محدد شنو باغي تشري وعارف الأثمنة ديالهوم باش ماتقولبش.
- ماتشريش أي حاجة غير لأنها رخيصة، ماتديروش بحالي ولا عندي قنت عامر غير بالسلعة د الشناوا وصدقت تانبيعهوم بأرخص الأثمنة
- تتبع مجموعات جيربيست في الفيسبوك حيت تايحطو الكوبونات اللي تنقص بهم ثمن السلعة
- الهموز ماتاتكونش غير يوم 11.11 تاتبدا من 8 أو 9 نونبر يعني بقى عينيك عالقرص
- وجد كونط جديد ما عمرك شريتي بيه لأن موقع جيربيست مثلا تايدير كوبونات خاصة فقط بالأعضاء الجدد (العام اللي فات زكلت شي كاميرات هموز كانوا دايرين الكوبون غير للأعضاء الجدد)
- فاش تشري السلعة صيفطها بالبريد المسجل باش توصلك دغيا حيت العام اللي فات كاين الناس اللي بقاو يتسناو السلعة ديالهوم 5 و 6 أشهر خصوصا في موقع علي إكسبريس
- قبل 11.11 بأيام تايدير علي إكسبريس ثمن السلعة وتايدير تا الثمن اللي غايولي يوم 11.11 على الأقل تاتعرف واش الثمن مناسبك وتقدر تحط السلعة اللي بغيتي فالسلة تالنهار الموعود
- الشراء بتطبيقات المواقع على الهواتف الذكية في الغالب تايكون قل من الشراء بالبيسي... دونك الخبار فراسك
- معلومات البطاقة البنكية أو الباي بال خاصها تكون ديجا مدخلها في الموقع ومأكتيفي لاكارط وداير الدوطاسيون باش مضيعش الوقت خصوصا في حالة السلع محدودة العدد
- إيلا فكرتي تشري تليفون أو طابليط عول على أنك غاتخلص الديوانة ويلا صيفطتيه فأرامكس أو DHL وتشد غادي يحيدولك الجلدة لذلك صيفطو في البريد المسجل أحسن لك تا إيلا تشد غاتخلص غير الديوانة ماشي أرامكس والديوانة
- فاش تجي تشري شي سلعة شوف بعدا الخصائص ديالها واش صالحة تخدم في المغرب ولا لا.
دعيوة بالرحمة د الوالدين أفضل من الدنيا ومافيها.
إرسال تعليق